Oʻzbekiston va Qozogʻiston soliq sohasida ikki tomonlama hamkorlikni rivojlantirish masalalarini muhokama qilishdi

Toshkent, O‘zbekiston (UzDaily.uz) — O‘zbekiston Respublikasi Soliq qo‘mitasi Raisi Farrux Pulatov Qozog‘iston Respublikasining O‘zbekiston Respublikasidagi Favqulodda va Muxtor Elchisi Beybut Atamkulov bilan uchrashuv o‘tkazdi.

Muzokaralar davomida tomonlar soliq sohasidagi ikki tomonlama hamkorlikning yuqori darajada ekanligini tasdiqlab, uning izchil rivojlanib borayotganini ta’kidladilar.

Soliq ma’murchiligini takomillashtirish, raqamlashtirish hamda ushbu yo‘nalishda o‘zaro manfaatli hamkorlikni kengaytirish masalalari muhokama qilindi.

Shuningdek, amalga oshirilayotgan iqtisodiy islohotlar va integratsiya jarayonlari sharoitida yondashuvlarni muvofiqlashtirish, jumladan, O‘zbekistonning Jahon savdo tashkilotiga qo‘shilishi, investitsiya muhitini yaxshilash va tadbirkorlikni qo‘llab-quvvatlash masalalariga alohida e’tibor qaratildi.

Uchrashuv yakunida tomonlar amaliy hamkorlikni yanada chuqurlashtirish va konstruktiv muloqotni davom ettirishga tayyor ekanliklarini bildirdilar.