Oʻzbekiston delegatsiyasi Global sogʻliqni saqlash diplomatiyasi boʻyicha yuqori darajadagi muloqotda ishtirok etdi

Toshkent, O‘zbekiston (UzDaily.uz) — O‘zbekiston delegatsiyasi, Sog‘liqni saqlash vaziri o‘rinbosari Alisher Boboyev boshchiligida, 2026 yil 16–18 fevral kunlari Ashxobod shahrida o‘tgan Global sog‘liqni saqlash diplomatiyasi bo‘yicha yuqori darajadagi muloqotda ishtirok etdi.

Tadbir JSST Yevropa va Markaziy Osiyo mintaqasiga a’zo 10 davlat vakillarini birlashtirib, o‘zaro ishonch, hamkorlik va sog‘liq xavfsizligini mustahkamlashga qaratildi.

Alisher Boboyev o‘z nutqida shunday ta’kidladi: “Ushbu muloqotni muvofiqlashtirilgan yondashuvlarni shakllantirish va mintaqaviy hamkorlikni yanada kuchaytirish uchun muhim siyosiy platforma sifatida baholaymiz.”

Shuningdek, O‘zbekiston delegatsiyasi JSSTning Yevropa va Markaziy Osiyo bo‘yicha mintaqaviy direktori doktor Hans Kluge bilan ikki tomonlama uchrashuv o‘tkazdi.

Unda “O‘zbekiston–2030” strategiyasi doirasidagi sog‘liqni saqlash tizimi islohotlari hamda JSSTning Yevropa ish dasturi (EPW2), Mamlakat bilan hamkorlik strategiyasi (CCS) va 2030 yilgacha mo‘ljallangan Ikkinchi Markaziy Osiyo yo‘l xaritasi (CARM2) doirasidagi hamkorlik masalalari muhokama qilindi.

Mazkur muloqot JSSTning Yevropa mintaqaviy direktori doktor Hans Kluge tashabbusi bilan yo‘lga qo‘yilgan AHEAD (AHEAD – Action for Health through Engagement, Advocacy, and Diplomacy - "Sog'liqni saqlash sohasidagi hamkorlik, himoya va diplomatiya orqali harakatlar") flagman dasturi doirasida o‘tkazildi.

Dastur sog‘liqni saqlash rahbarlari va diplomatlarni birlashtirish, umumiy yondashuvlarni shakllantirish hamda global qarorlar markazida inson salomatligi va sha’nini saqlab qolishga qaratilgan.