Oʻzatom MVM EGI Zrt bilan Vengriyaning Oʻzbekiston atom elektr stansiyasida ishtirok etishini muhokama qildi

Toshkent, O‘zbekiston (UzDaily.uz) — "O‘zatom" agentligida Agentlik direktori hamda Vengriyaning MVM EGI Zrt kompaniyasi bosh direktori Peter Karpati bilan O‘zbekiston Respublikasi hududida integratsiyalashgan atom elektr stansiyasini qurish loyihasida Vengriya tomonining ishtiroki masalalari yuzasidan muzokaralar bo'lib o'tdi.

Uchrashuv davomida tomonlar Vengriya Eksimbanki tomonidan eksport moliyalashtirishini jalb etish imkoniyatlari, loyihani moliyalashtirishni tashkil etishning joriy holati, shuningdek, "quruq sovutish" tizimlarini joriy etish loyihasini amalga oshirish bo‘yicha to‘rt tomonlama asosiy bitimni imzolash istiqbollarini muhokama qildilar.

Muzokaralar O‘zbekiston Respublikasi va Vengriya o‘rtasida atom energiyasidan tinch maqsadlarda foydalanish sohasidagi hamkorlikning yuqori darajasini, ilg‘or texnologiyalarini almashish va yirik milliy infratuzilma loyihalarini amalga oshirish uchun xalqaro moliyaviy vositalardan birgalikda foydalanishga tayyorligini tasdiqladi.

Loyihaning samarali rivojlanishini ta’minlash, uzoq muddatli xalqaro hamkorlikni mustahkamlash va O‘zbekiston atom sanoatiga innovatsion yuqori texnologik yechimlarni joriy etish maqsadida loyihaning barcha ishtirokchilari faoliyatini muvofiqlashtirish masalalariga alohida e’tibor qaratildi.

Uchrashuv yakunida 2026-yil yanvar oyida Vengriyada "O‘zatom" agentligi delegatsiyasining rasmiy tashrifi doirasida Vengriya Eksimbanki, OTP Bank va Vengriya tomonining boshqa asosiy moliyaviy va idoraviy tuzilmalari vakillari ishtirokida muzokaralarning navbatdagi bosqichini o‘tkazish to‘g‘risida kelishuvga erishildi.