Toshkent, O‘zbekiston (UzDaily.uz) — Xitoy Xalq Respublikasida “O‘zbekiston–Xitoy" savdo-iqtisodiy va investitsiya forumi” bo‘lib o‘tdi. Unda O‘zbekiston Respublikasi Bosh vaziri o‘rinbosari Jamshid Xodjaev boshchiligidagi delegatsiya vakillari ishtirok etdi.

So‘nggi yillarda O‘zbekiston–Xitoy munosabatlari yangi bosqichga ko‘tarilib, ko‘plab sohalarda o‘zaro teng manfaatlar asosida izchil rivojlanmoqda. Ayniqsa, qishloq xo‘jaligi yo‘nalishida — paxtachilikda Xitoy agrotexnologiyalarini joriy etish, urug‘chilikni rivojlantirish, ilm-fan va innovatsiyalar sohasida tajriba almashish kabi yo‘nalishlarda hamkorlik ijobiy natijalar bermoqda.

Forum doirasida imzolangan hujjatlar esa ikki tomonlama hamkorlikning yangi bosqichini belgilab beruvchi muhim qadam bo‘ldi.

Xususan, O‘zbekiston delegatsiyasi tarkibidagi Qishloq xo‘jaligi vaziri o‘rinbosari Alisher Shukurov va Xitoyning “China Broad Future Tobacco International Import and Export Trading Co. Ltd” kompaniyasi bosh ijrochi direktori Fu Bo mamlakatimizda qo‘shma korxona va agrosanoat parkini tashkil etish bo‘yicha Hamkorlik bitimini imzolashdi.

Shuningdek, Alisher Shukurov va Xitoyning “Henan Bio-Industry Group Co., Ltd” kompaniyasi bosh ijrochi direktori Qin Tian Cang o‘rtasida “Xitoy–O‘zbekiston biotexnologiya va qishloq xo‘jaligi texnologiyalari sanoat parki tashkil etish” loyihasini amalga oshirish bo‘yicha Hamkorlik memorandumi imzolandi.

Mazkur loyihalar yangi ish o‘rinlarini yaratish, agrar sohaga zamonaviy texnologiyalar va innovatsion yondashuvlarni keng joriy etish imkonini beradi.

Forum yakunida tomonlar amalga oshiriladigan qo‘shma loyihalarning istiqbolli bo‘lishiga umid bildirib, hamkorlikning o‘zaro manfaatli jihatlarini muhokama qildilar va hujjatlar almashdilar.