O‘zbekistonning Dubaydagi Bosh konsulxonasi: mintaqadagi vaziyat barqarorlashdi, Toshkentga reyslar qayta tiklandi

Toshkent, O‘zbekiston (UzDaily.uz) — O‘zbekistonning Dubaydagi Bosh konsulxonasi mintaqadagi vaziyat barqarorlashgani va aviaqatnovlar qayta tiklangani haqida xabar qildi. Havo hududi ochilganidan so‘ng Dubay – Toshkent yo‘nalishi bo‘yicha reyslar UzAirways, CentrumAir va Qanot Sharq mahalliy aviakompaniyalari tomonidan bosqichma-bosqich amalga oshirila boshlandi.

Konsulxona maʼlumotiga ko‘ra, 5–6 mart kunlari UzAirways reyslari, shuningdek 6 mart kuni CentrumAir reysi Toshkentga bo‘sh o‘rinlar mavjud holda yetib kelgan. Bu yaqin vaqtda safarni rejalashtirayotgan O‘zbekiston fuqarolari uchun Vatanga qaytish bo‘yicha qo‘shimcha imkoniyatlar yaratadi.

Avvalroq FlyDubai va Air Arabia reyslariga chipta xarid qilgan, ammo parvozlar bekor qilinishi yoki kechiktirilishiga duch kelgan fuqarolarga darhol o‘z turoperatorlari yoki aviakompaniyalar vakillariga murojaat qilish tavsiya etildi. Konsulxonada taʼkidlanishicha, hozirgi vaqtda O‘zbekistonga qaytish uchun muqobil kundalik reyslar mavjud.

Bosh konsulxona xodimlari kunu tun ishlashda davom etmoqda va yordamga muhtoj barcha vatandoshlarga konsullik-huquqiy yordam ko‘rsatmoqda. Diplomatik vakolatxona fuqarolarni faqat rasmiy manbalardagi maʼlumotlarga tayanishga va ijtimoiy tarmoqlardagi tekshirilmagan mish-mishlarga ishonmaslikka chaqirdi.