O‘zbekistonning Aktaudagi Bosh konsulligi: Aktau yaqinidagi yo‘l-transport hodisasida qurbonlar yo‘q

Toshkent, O‘zbekiston (UzDaily.uz) — O‘zbekiston Respublikasining Aktau shahridagi Bosh konsulxonasi 30 noyabr kuni Qozog‘istonning Aktobe viloyatida sodir bo‘lgan yo‘l-transport hodisasi haqida ma’lumot e’lon qildi.

Rasmiy ma’lumotlarga ko‘ra, joriy yil 30 noyabr kuni soat 21:00 da “Rossiya Federatsiyasi – Aktobe – Qizilorda – Almata” respublika ahamiyatiga ega avtomobil yo‘lida “Moskva – Toshkent” yo‘nalishi bo‘ylab harakatlanib kelayotgan, davlat raqami 774BOT13 bo‘lgan “VanHool” rusumli yo‘lovchi avtobusi yo‘l-transport hodisasiga uchragan.

Hodisa vaqtida avtobusda 54 nafar O‘zbekiston Respublikasi fuqarosi bo‘lgan. YTH oqibatida jabrlanuvchi va halok bo‘lganlar yo‘q.

Barcha yo‘lovchilar favqulodda vaziyatlar xizmati va politsiya xodimlari tomonidan Aktobe viloyati Aytekebi tumani, Qorabutoq qishlog‘idagi masjidga vaqtincha joylashtirildi. Fuqarolarga oziq-ovqat va zarur yordamlar ko‘rsatilmoqda.

Fuqarolarni O‘zbekistonga boshqa avtobus orqali tezkor ravishda qaytarish choralari ko‘rilmoqda.

Vaziyat O‘zbekistonning Qozog‘istondagi Elchixonasi va Bosh konsulligi tomonidan to‘liq nazoratga olingan bo‘lib, Qozog‘iston tomonining masʼul idoralari bilan doimiy aloqa o‘rnatilgan.