O‘zbekistonlik tennischi Polina Kudermetova Canberra Challenger turnirining kumush medalini qo‘lga kiritdi

Toshkent, O‘zbekiston (UzDaily.uz) — O‘zbekistonlik tennischi Polina Kudermetova Canberra Challenger seriyasi turnirining kumush sovrindori bo‘ldi. Hal qiluvchi final uchrashuvida u Tayvan vakili Joanna Garlandga 4:6, 2:6 hisobida mag‘lub bo‘ldi.

Finalga chiqish Kudermetovaga 19,7 ming AQSH dollari miqdoridagi mukofot puli va WTA reytingi uchun 81 ochko keltirdi. Turnir g‘olibasi esa 33,6 ming dollardan ortiq mukofot puli ishlab topib, reytingiga 125 ochko qo‘shib oldi.

Polina Kudermetova o‘tgan yil oxiridan beri O‘zbekiston sharafini himoya qilib kelmoqda.

Bunga qadar tennischi Rossiya bayrog‘i ostida ishtirok etgan. O‘zbekiston terma jamoasiga o‘tish paytida u Ayollar tennis assotsiatsiyasining jahon reytingida 104-o‘rinni egallab turgan.

Sportchining murabbiyi — mashhur rossiyalik tennischi Dinara Safina bo‘lib, u avvalroq 2024 yilgi Olimpiya o‘yinlarida juftlik bahslarida kumush medal sohibi bo‘lgan Diana Shnayder bilan ham ishlagan.