O‘zbekistonlik qilichbozlar Osiyo chempionatida kumush medalni qo‘lga kiritdi

Toshkent, O‘zbekiston (UzDaily.uz) — O‘zbekistonning yoshlar o‘rtasidagi qilichbozlik bo‘yicha terma jamoasi Indoneziyaning Jakarta shahrida o‘tayotgan Osiyo chempionatida muvaffaqiyatli ishtirok etib, mamlakat medallar jamg‘armasini yana bir mukofot bilan boyitdi.

Yoshlar o‘rtasidagi qilichbozlik bo‘yicha jamoaviy musobaqada o‘zbekistonlik sportchilar yuqori darajadagi tayyorgarlikni namoyish etib, finalga ishonch bilan chiqishdi. Hal qiluvchi bahsga yo‘l olgan jamoa Avstraliya va Gonkongdan kelgan raqiblarini mag‘lub etdi.

Final uchrashuvida o‘zbekistonlik qilichbozlar Xitoy jamoasiga yutqazib qo‘yishdi va turnir natijalariga ko‘ra qitʼa chempionatida kumush medallarni qo‘lga kiritishdi.

Qo‘lga kiritilgan natija O‘zbekistonda qilichbozlik sport turining izchil rivojlanayotganini hamda milliy terma jamoaning yoshlar tarkibi yuqori salohiyatga ega ekanini tasdiqlaydi.