O‘zbekistonlik hakamlar JCH–2026da faoliyat yuritadi

Toshkent, O‘zbekiston (UzDaily.uz) — O‘zbekistonlik uch nafar futbol hakami 2026 yilgi jahon chempionatining rasmiy hakamlar korpusiga kiritiladi. Mazkur musobaqa 11 iyundan 19 iyulga qadar AQSH, Kanada va Meksika stadionlarida bo‘lib o‘tadi.

O‘zbekistondan bosh hakam sifatida Ilgiz Tantashev tayinlandi, unga yordamchi hakamlar sifatida Andrey Sapenko va Timur Gaynullin faoliyat olib boradi.

Turnir 39 kun davom etadi va kengaytirilgan formatda o‘tkaziladi: guruhda birinchi ikki o‘rinni egallagan jamoalardan tashqari, ilk bor uchinchi o‘rinni olgan sakkizta terma jamoa ham 1/16 final bosqichiga yo‘l oladi. Shu tariqa, pley-off bosqichi 32 jamoa ishtirokida boshlanadi.

O‘zbekiston milliy terma jamoasi o‘z tarixida ilk bor ushbu musobaqaga yo‘llanma oldi va K guruhida Portugaliya, Kolumbiya hamda Kongo Demokratik Respublikasi jamoalari bilan kuch sinashadi.

O‘zbekistonliklar uchun turnir 18 iyun kuni Mexiko shahrida Kolumbiya terma jamoasiga qarshi o‘yin bilan boshlanadi. Uchrashuv Toshkent vaqti bilan soat 08:00 da start oladi. Ikkinchi guruh bahsi 23 iyun kuni Xyuston shahrida bo‘lib o‘tadi, unda raqib Portugaliya terma jamoasi bo‘ladi. O‘yin Toshkent vaqti bilan soat 23:00 da boshlanadi.

Guruh bosqichi 28 iyun kuni Atlanta shahridagi «Mercedes-Benz Stadium» stadionida Kongo Demokratik Respublikasiga qarshi o‘yin bilan yakunlanadi. Uchrashuv Toshkent vaqti bilan soat 04:30 da boshlanadi.