O‘zbekistonga 9 oyda 3,2 million mobil telefon olib kirildi

Toshkent, O‘zbekiston (UzDaily.uz) — 2025 yil yanvar–sentyabr oylari davomida O‘zbekistonga jami 3,2 million dona mobil telefon import qilindi. Ularning umumiy qiymati 370,8 million AQSH dollarini tashkil etdi. Bu haqda Milliy statistika qo‘mitasi xabar berdi.

O‘tgan yilning shu davriga nisbatan telefonlar importi 219,9 ming donaga yoki 7,4 foizga oshgan.

Telefon yetkazib beruvchi mamlakatlar orasida anʼanaviy ravishda Osiyo davlatlari yetakchilik qilmoqda. Birinchi o‘rinda — Xitoy, u yerdan O‘zbekistonga 2,49 million donaga yaqin mobil telefon olib kirilgan.

Ikkinchi o‘rinni Vyetnam egallab, u yerdan 619,2 ming dona telefon keltirilgan. Keyingi o‘rinlarda Birlashgan Arab Amirliklari (65,3 ming dona), Hindiston (31,9 ming dona) va Koreya Respublikasi (4,8 ming dona) joy olgan.

Shuningdek, boshqa mamlakatlardan yana 2,2 ming dona mobil telefon import qilingan.