O‘zbekistonda yuqori intizomga ega tadbirkorlarga 4,9 trln so‘m QQS qaytarildi

Toshkent, O‘zbekiston (UzDaily.uz) — Joriy yil fevral holatiga ko‘ra, O‘zbekistonda Prezidentning PQ–39-son qarori bilan joriy etilgan Tadbirkorlarning barqarorlik reytingi tizimida jami 572,8 mingta biznes subyekti faoliyati muvaffaqiyatli baholandi.

Eng intizomli tadbirkorlar uchun moliyaviy imtiyozlar sezilarli bo‘ldi. Ishonchning eng yuqori darajasiga ega bo‘lgan AAA toifasidagi 2 079 ta korxona qo‘shimcha tekshiruvlar o‘tkazilmasdan, avtomatik tarzda bir kun ichida jami 4,9 trln so‘m miqdorida qo‘shilgan qiymat solig‘i qaytarib berildi, deb xabar qiladi O‘zbekiston Savdo-sanoat palatasi.

Reyting tizimi soliq madaniyati va biznes yuritishdagi shaffoflikni sezilarli darajada oshirdi. Jumladan, hisobotlarni belgilangan muddatlarda topshirayotgan tadbirkorlar soni 452,5 mingtaga yetdi, bu avvalgi davrga nisbatan 219,6 mingtaga ko‘pdir.

Soliqlarni o‘z vaqtida to‘layotgan korxonalar soni 261,2 mingtani tashkil etib, 181,3 mingtaga oshdi. Elektron hisob-fakturalarni belgilangan muddatlarda rasmiylashtirish hajmi esa 23,9 milliontaga yetdi va 20,8 milliontaga ko‘paydi.

Tadbirkorlar barqarorligi reytingi ijtimoiy masʼuliyat va bandlikni taʼminlashda ham muhim vositaga aylandi. 171,8 mingta korxonada xodimlar soni 1,1 million kishiga oshdi, rasman band aholi umumiy soni esa 5,4 million nafardan oshdi.