O‘zbekistonda yashil vodorod ishlab chiqarishning birinchi bosqichi ishga tushirildi

Toshkent, O‘zbekiston (UzDaily.uz) — Chirchiq shahrida yashil vodorod ishlab chiqarish bo‘yicha loyihaning birinchi bosqichi muvaffaqiyatli yakunlandi, deb xabar qildi O‘zbekiston Investitsiyalar, sanoat va savdo vazirligi.

Saudiya Arabistonining ACWA Power kompaniyasi tashabbusi bilan amalga oshirilayotgan, umumiy qiymati 88 million AQSH dollariga teng bo‘lgan ushbu loyiha doirasida 40 ta yangi ish o‘rni yaratildi.

Eslatib o‘tamiz, 2023 yil noyabr oyida O‘zbekiston Prezidenti Shavkat Mirziyoyev ACWA Power ishtirokida Toshkent viloyatida yashil vodorod ishlab chiqarish bo‘yicha pilot obyekt qurilishiga rasman start bergan edi.

Loyiha ikki bosqichda amalga oshiriladi: birinchi bosqichda 2025 yildan boshlab yiliga 3 000 tonna hajmda yashil vodorod ishlab chiqarishni yo‘lga qo‘yish nazarda tutilgan.

Ikkinchi bosqichda esa Chirchiq shahrida yashil vodorod asosida yiliga 500 ming tonnagacha ammiak ishlab chiqarishni tashkil etish, shuningdek, umumiy o‘rnatilgan quvvati 2,4 gigavattgacha bo‘lgan shamol elektr stansiyalar parkini qurish rejalashtirilgan bo‘lib, bu O‘zbekistonda barqaror energetika va «yashil iqtisodiyot»ni rivojlantirish yo‘lida muhim qadam bo‘ladi.