Toshkent, O‘zbekiston (UzDaily.uz) — 28 aprel kuni Iqtisodiy va moliya vazirligi, Markaziy bank, Qurilish va uy-joy-kommunal xo‘jaligi vazirligi, shuningdek, Quriluvchilar va developerlar assosatsiyasi ishtirokida davra suhbati bo‘lib o‘tdi. Unda ulushli qurilish to‘g‘risidagi qonun loyihasi ko‘rib chiqildi.

Ushbu hujjat 2025 yil 27 yanvardagi Prezident farmoni (№PF-11) ijrosini taʼminlash maqsadida ishlab chiqilgan bo‘lib, jismoniy va yuridik shaxslarning ko‘p kvartirali uylar va boshqa ko‘chmas mulk obyektlarini qurishga mablag‘larini jalb qilish mexanizmlarini takomillashtirishga qaratilgan.

Qonun loyihasi 14 ta bob va 46 ta moddadan iborat bo‘lib, ulushli qurilishda ishtirok etish tartibini, davlat organlarining vakolatlarini, quriluvchilar, ulushli qurilish ishtirokchilari va tijorat banklarining huquq va majburiyatlarini belgilaydi, shuningdek, eskrou-hisoblar bilan ishlash tartibini tartibga soladi.

Muhokama davomida developerlar amaliyotda uchrayotgan muammolarni hal etish bo‘yicha o‘z takliflarini bildirdi. Taʼkidlanishicha, bu takliflar qonunni takomillashtirish jarayonida inobatga olinadi. Tomonlar uy-joy qurilishi sohasini rivojlantirish va ulushli qurilishni samarali tartibga solish uchun davlat tuzilmalari va xususiy sektor o‘rtasida muntazam muloqotni davom ettirishga kelishib oldilar.