O‘zbekistonda “Umra” ziyorat safarlarini targ‘ib qilishda reklama to‘g‘risidagi qonun buzilishlari aniqlandi

Toshkent, O‘zbekiston (UzDaily.uz) — O‘zbekiston Respublikasi Raqobat qo‘mitasi ommaviy axborot vositalari va internet resurslarida joylashtirilgan reklama materiallarini «Reklama to‘g‘risida»gi qonun talablariga muvofiqligi yuzasidan tekshiruvni boshladi. Ayniqsa turoperatorlar tomonidan “Umra” ziyorat safarlarini tashkil etish va o‘tkazishga doir reklamalarga alohida eʼtibor qaratildi.

Tahlil jarayonida Surxondaryo va Farg‘ona viloyatlaridagi hududiy boshqarmalar tomonidan «Sharofiddin Travel» va «Fayz Tour Travel» masʼuliyati cheklangan jamiyatlari amaldagi turistik faoliyat litsenziyasi mavjud bo‘lmagan holda reklama materiallarini joylashtirgani aniqlandi, bu esa qonun talablarini buzish hisoblanadi. Ushbu tashkilotlarga nisbatan ishlar qo‘zg‘atilib, moliyaviy jarimalar qo‘llanildi.

Bundan tashqari, Qoraqalpog‘iston Respublikasi, Samarqand, Surxondaryo, Namangan, Farg‘ona, Xorazm viloyatlari hamda Toshkent shahrida o‘tkazilgan tekshiruvlar davomida 12 ta Telegram kanal va Instagram sahifalari maʼmurlari tomonidan qonun talablari buzilgani aniqlandi. Ular orasida “Marmaristour.uz”, “rozumbetovjurabek”, “uzmobile_aviakassa”, «Samarqanddan Umra ziyorati», «Umra Ziyorati», «Fazliddin Umra jamiyati», «Muborak safar», “Qo‘qimboyliklar”, «Saudiyaga sayohat», «Umra rasmiy», “Aviakassa721” va “Nursafar” bor. Masʼul shaxslar maʼmuriy javobgarlikka tortildi.

O‘tkazilgan o‘rganishlar yakunlariga ko‘ra reklama qoidalariga rioya etilishini taʼminlash va isteʼmolchilar huquqlarini himoya qilishga qaratilgan qonunda nazarda tutilgan barcha choralar ko‘riladi.