O‘zbekistonda turk kapitali ishtirokidagi korxonalar soni 2,1 mingtadan oshdi

Toshkent, O‘zbekiston (UzDaily.uz) — O‘zbekistonda turk kapitali ishtirokidagi korxonalar soni o‘sishda davom etmoqda.

Milliy statistika qo‘mitasi maʼlumotlariga ko‘ra, 2026 yilning 1 yanvar holatiga O‘zbekistonda Turkiya kapitali ishtirokida jami 2 137 ta korxonalar faoliyat yuritmoqda.

Umumiy sondan 496 ta kompaniya qo‘shma korxona shaklida ro‘yxatdan o‘tgan bo‘lsa, yana 1 641 ta korxona to‘liq xorijiy, jumladan turk kapitaliga tegishli. Bu ko‘rsatkichlar turk biznesining O‘zbekiston bozoriga bo‘lgan barqaror qiziqishi hamda Turkiyaning mamlakat iqtisodiyotidagi investitsiyaviy ishtirokining kengayib borayotganini aks ettiradi.

Turk kapitali ishtirokidagi korxonalarning eng katta qismi Toshkent shahriga to‘g‘ri keladi — 1 305 ta.

Toshkent viloyatida bunday korxonalar soni 298 tani tashkil etadi. Shuningdek, Samarqand viloyatida 115 ta, Farg‘ona viloyatida 70 ta, Andijon viloyatida 58 ta va Jizzax viloyatida 55 ta korxona ro‘yxatdan o‘tgan.

Buxoro va Namangan viloyatlarida turk kapitali ishtirokidagi korxonalar soni 43 tadan. Surxondaryo viloyatida 31 ta, Xorazm va Navoiy viloyatlarida esa 30 tadan korxona faoliyat ko‘rsatmoqda.

Sirdaryo viloyatida 23 ta korxona qayd etilgan bo‘lsa, Qashqadaryo viloyati va Qoraqalpog‘iston Respublikasida bunday korxonalar soni 18 tadan tashkil etadi.