O‘zbekistonda turistik agentliklar xizmatlari hajmi 8 oyda 2,2 trln so‘mdan oshdi

Toshkent, O‘zbekiston (UzDaily.uz) — 2025 yilning yanvar–avgust oylarida O‘zbekistondagi turistik agentliklar jami 2,2 trillion so‘mlik xizmat ko‘rsatdi.

Milliy statistika qo‘mitasi maʼlumotlariga ko‘ra, bu o‘tgan yilning shu davriga nisbatan 44 foizga ko‘p.

Eng katta xizmat hajmi poytaxt – Toshkent shahri hissasiga to‘g‘ri kelgan bo‘lib, bu yerdagi ko‘rsatkich 1,7 trillion so‘mga yetgan.

Undan keyin Samarqand viloyati 305 milliard so‘m, Xorazm viloyati 73,1 milliard so‘m, Toshkent viloyati 52,2 milliard so‘m va Buxoro viloyati 31,9 milliard so‘m bilan qayd etilgan.

Ushbu besh hudud mamlakat bo‘yicha turistik agentliklar tomonidan ko‘rsatilgan umumiy xizmatlar hajmining 97,1 foizini tashkil etgan.