O‘zbekistonda sud Telegram-kanal administratorini mualliflik huquqini buzgani uchun jarimaga tortdi

Toshkent, O‘zbekiston (UzDaily.uz) — O‘zbekiston Respublikasi Adliya vazirligiga mualliflik huquqi buzilgani munosabati bilan «Tuda-SyudaUZ/Mesta i sobitiya» Telegram-kanaliga nisbatan huquqiy choralar ko‘rish haqida murojaat kelib tushgan.

Tekshiruv jarayonida aniqlanishicha, kanalda muallif E. Omelchukning ruxsatisiz «Toshkentning yangi yil uchun eng yaxshi 3 restorani» va «Ushbu maxfiy bozorda» nomli videomateriallar qo‘llanilgan. Kanal administratori S. Nazarov ushbu videoroliklarni muallifning roziligisiz joylashtirgan bo‘lib, bu holat hujjatlar bilan tasdiqlangan.

Mazkur holat yuzasidan qoidabuzarga nisbatan O‘zbekiston Respublikasining Maʼmuriy javobgarlik to‘g‘risidagi kodeksining mualliflik huquqi va turdosh huquqlarni buzish uchun javobgarlikni nazarda tutuvchi 177-1-moddasi asosida maʼmuriy huquqbuzarlik to‘g‘risida bayonnoma rasmiylashtirildi. Ish materiallari sudga yuborildi.

Mirzo Ulug‘bek tuman sudi qaroriga ko‘ra, qoidabuzarga nisbatan maʼmuriy jarima jazosi qo‘llanildi.

Maʼmuriy javobgarlik to‘g‘risidagi kodeksning 177-1-moddasi sanksiyalariga muvofiq, fuqarolarga nisbatan 5 dan 15 ta bazaviy hisoblash miqdorigacha, yaʼni 2,06 million so‘mdan 6,18 million so‘mgacha, mansabdor shaxslarga esa 15 dan 30 ta bazaviy hisoblash miqdorigacha, yaʼni 6,18 million so‘mdan 12,36 million so‘mgacha jarima solinishi, shuningdek, asarlarning kontrafakt nusxalari, turdosh huquq obyektlari hamda ularni ko‘paytirish va tarqatishda foydalanilgan materiallar va uskunalarni musodara qilish nazarda tutilgan.