O‘zbekistonda qurilish materiallari ishlab chiqarish 13,5 foizga oshdi

Toshkent, O‘zbekiston (UzDaily.uz) — 2025 yilning dastlabki o‘n oyida O‘zbekistonda qurilish materiallari ishlab chiqarish hajmi 45,7 trln so‘mni tashkil etdi, bu o‘tgan yilning shu davriga nisbatan 13,5 foiz ko‘pdir. Bu haqda brifingda “O‘zsanoatqurilishmateriallari” Assotsiatsiyasi matbuot xizmatining rahbari Jamshid Shermetov maʼlum qildi.

Yanvar–oktyabr oylarida 18,8 million tonna sement, 33,3 million kvadrat metr qurilish shishasi, 41 million kvadrat metr keramik plita, 91,8 million kvadrat metr gipsokarton listlari, 301 ming tonna quruq qurilish qo‘shimchalari va 751 ming dona sanitar-texnika buyumlari ishlab chiqarildi.

Investitsiya loyihalari doirasida umumiy qiymati 1,065 milliard dollar bo‘lgan 230 ta obyektlar foydalanishga topshirildi va bu 8 712 ta yangi ish o‘rinlarini yaratish imkonini berdi. Ular orasida Qashqadaryo viloyati Yakkabog‘ tumanida joylashgan, “Al-Kamol Rise Group” tomonidan amalga oshirilgan 4,7 million dollarlik eshik, oynali ramkalar va mebel ishlab chiqarish klasteri hamda Samarqand viloyati Ishtixon tumanidagi “Odil eco” MCHJning 1,5 million dollarlik cho‘yanni qayta ishlash loyihasi alohida eʼtirof etildi.

Davlat investitsiya dasturi doirasida o‘zlashtirilgan to‘g‘ridan-to‘g‘ri xorijiy investitsiyalar va kreditlar 168,6 million dollarga yetdi, bu rejadan 117,6 foiz ko‘p bo‘lib, o‘tgan yilning shu davriga nisbatan 26 foiz yuqori ko‘rsatkichdir.

Alyuminiy mahsulotlari, keramika, toshdan tayyorlangan mahsulotlar, shisha, sement, DSP va MDF plitalari, PVX hamda plastik buyumlar kabi qurilish materiallari eksporti o‘n oy davomida o‘tgan yilga nisbatan 187 million dollarga oshdi. Eksport hajmini yana-da kengaytirish maqsadida Boku, Dushanbe, Lohur, Qobul, Mazori-Sharif, Aqtau va Jalolobod shaharlarida savdo uylari, shourumlar va omborxonalar tashkil etildi.

Bundan tashqari, o‘zbek ishlab chiqaruvchilari Innoprom Central Asia-2025 (Toshkent), Kazan Forum 2025, «Made in Uzbekistan» (Tbilisi va Ulan-Bator), Turkic International Exhibition (Boku), Los Angeles Build Expo, Bud Expo (Belarus), Brno Expo va Baku Build 2025 kabi xalqaro biznes-forum va ko‘rgazmalarda ishtirok etdilar. Ushbu tadbirlar O‘zbekiston mahsulotlarini xorijiy bozorlarga targ‘ib etish va tarmoqning eksport salohiyatini mustahkamlashga xizmat qilmoqda.