O‘zbekistonda qizamiqqa qarshi immunitet o‘rganiladi

Toshkent, O‘zbekiston (UzDaily.uz) — O‘zbekistonda aholining qizamiqqa qarshi immunitet darajasini aniqlashga qaratilgan keng qamrovli tadqiqot boshlandi.

O‘zbekistonda aholining qizamiq kasalligiga qarshi immunitet darajasini o‘rganishga qaratilgan keng ko‘lamli tadqiqot start oldi.

Loyiha mamlakatning yetti hududini, shuningdek poytaxtni qamrab oladi. Unda asosiy eʼtibor bolalar va reproduktiv yoshdagi ayollarga qaratiladi.

Tayyorgarlik bosqichi 25–27 mart kunlari Toshkent shahrida o‘tkazilmoqda. Unda sanitariya-epidemiologiya xizmati hududiy bo‘linmalari xodimlari uchun o‘quv seminari tashkil etilgan. Tadbir UNOPS va Integral Global ishtirokida o‘tkazilmoqda. Trening davomida mutaxassislar kelgusi seroepidemiologik tadqiqotning maqsadlari, metodologiyasi va asosiy yo‘nalishlarini muhokama qilmoqda.

Loyihaning asosiy vazifasi qizamiqqa qarshi jamoaviy immunitet darajasini aniqlash va vaksinatsiya samaradorligini baholashdan iborat.

Tadqiqot doirasida qizamiq virusiga qarshi IgG antitanalarining mavjudligi o‘rganiladi. Bu aholining himoya darajasi bo‘yicha xolis maʼlumotlarni olish imkonini beradi.

Tadqiqot Qoraqalpog‘iston Respublikasi, Qashqadaryo, Namangan, Samarqand, Xorazm va Toshkent viloyatlari, shuningdek Toshkent shahrini qamrab oladi.

Har bir hududda 14 tadan tibbiyot muassasasi tanlab olingan bo‘lib, ishtirokchilarning umumiy soni taxminan 4,9 ming nafarni tashkil etadi. Loyihada ishtirok etish ixtiyoriy bo‘lib, ilmiy asoslangan tanlovga tayanadi.

Kutilishicha, olingan natijalar mamlakatda qizamiq bo‘yicha epidemiologik vaziyatni yana-da aniq baholash va qo‘shimcha profilaktik chora-tadbirlarni ishlab chiqish imkonini beradi.

Bu esa jamoat salomatligi tizimini mustahkamlash va aholining infeksion kasalliklar ehtimoliy tarqalishiga bardoshliligini oshirish yo‘lida muhim qadam bo‘ladi.