O‘zbekistonda oziq-ovqat tizimlariga asoslangan sog‘lom va barqaror ovqatlanish bo‘yicha tavsiyalarni ishlab chiqish jadallashmoqda

Toshkent, O‘zbekiston (UzDaily.uz) — O‘zbekiston ovqatlanish bo‘yicha milliy siyosatni mustahkamlash hamda qishloq xo‘jaligi va oziq-ovqat tizimlarini transformatsiya qilish yo‘lida muhim qadam qo‘ymoqda. Bu jarayon oziq-ovqat tizimlariga asoslangan sog‘lom ovqatlanish bo‘yicha tavsiyalarni (FSBDGs) ishlab chiqish orqali amalga oshirilmoqda.

Toshkent shahrida “O‘zbekistonda oziq-ovqat tizimlariga asoslangan sog‘lom ovqatlanish bo‘yicha tavsiyalarni ishlab chiqishni jadallashtirish” mavzusida texnik seminar bo‘lib o‘tdi. Unda davlat organlari, ilmiy-tadqiqot muassasalari va rivojlanish bo‘yicha hamkorlar vakillari ishtirok etib, barqarorlik tamoyillariga mos, ilmiy asoslangan ovqatlanish bo‘yicha tavsiyalarni ishlab chiqish masalalarini muhokama qildilar.

Seminar O‘zbekiston Respublikasi Qishloq xo‘jaligi vazirligi tomonidan BMTning Oziq-ovqat va qishloq xo‘jaligi tashkiloti (FAO) bilan hamkorlikda tashkil etildi hamda FAOning “Qishloq xo‘jaligi va oziq-ovqat tizimlari nuqtai nazaridan noto‘g‘ri ovqatlanishni bartaraf etish bo‘yicha ko‘ptarmoqli siyosiy tavsiyalar” loyihasi doirasida amalga oshirildi.

Mazkur tavsiyalar hukumat tomonidan ilgari surilayotgan zamonaviy yondashuv bo‘lib, unda ovqatlanish, sog‘liqni saqlash va atrof-muhit barqarorligi o‘zaro uyg‘un holda ko‘rib chiqiladi. Qishloq xo‘jaligi va oziq-ovqat tizimlarining barcha bosqichlarini qamrab olgan holda, ushbu yondashuv siyosatlarni yanada muvofiqlashtirishga xizmat qiladi hamda uzoq muddatli oziq-ovqat xavfsizligi va aholi salomatligini yaxshilashga hissa qo‘shadi.

“Noto‘g‘ri ovqatlanish muammosini hal etish uchun qishloq xo‘jaligi, sog‘liqni saqlash va oziq-ovqat tizimlari o‘zaro uyg‘un holda ishlashi zarur. Bugungi kunda O‘zbekiston ayniqsa aholining himoyaga muhtoj qatlamlari uchun sog‘lom ovqatlanishni yaxshilashga qaratilgan islohotlarni izchil amalga oshirmoqda,” — dedi O‘zbekiston Respublikasi Qishloq xo‘jaligi vaziri maslahatchisi Nuriddin Kushnazarov.

Seminar davomida ishtirokchilar ovqatlanish, sog‘liq va barqarorlik yo‘nalishlaridagi milliy ustuvor masalalarni ko‘rib chiqib, milliy ma’lumotlar, ilmiy dalillar hamda manfaatdor tomonlar bilan o‘tkazilgan maslahatlashuvlarga tayandilar. Tizimli tahlil natijasida asosiy muammolar qatoriga mikroelementlar yetishmovchiligi, ortiqcha vazn va semirish, turli yuqumli bo‘lmagan kasalliklar hamda oziq-ovqat xavfsizligi bilan bog‘liq masalalar kiritildi.

Shuningdek, oziq-ovqat bilan bog‘liq ekologik va ijtimoiy-iqtisodiy jihatlar ham ko‘rib chiqilib, yer degradatsiyasi, suv resurslaridan foydalanish, oziq-ovqat chiqindilari, issiqxona gazlari chiqindilari hamda sog‘lom ovqatlanishning iqtisodiy imkoniyati kabi masalalarga alohida e’tibor qaratildi.

“Ushbu seminar O‘zbekistonda barqaror oziq-ovqat tizimlariga asoslangan sog‘lom ovqatlanishni rivojlantirish yo‘lida muhim bosqich hisoblanadi,” — dedi FAOning Yevropa va Markaziy Osiyo bo‘yicha mintaqaviy vakolatxonasi Oziq-ovqat xavfsizligi va iste’molchilar huquqlarini himoya qilish bo‘yicha mutaxassisi Mary Kenny. “Mazkur tashabbus FAOning ovqatlanish bo‘yicha tavsiyalarni ishlab chiqish yondashuviga mos keladi va sog‘lom ovqatlanishni targ‘ib qilish faqat sog‘liqni saqlash sohasi bilan cheklanmasligini ko‘rsatadi. Oziq-ovqat tizimidagi barcha ishtirokchilar inson salomatligi va atrof-muhit barqarorligini ta’minlaydigan ovqatlanish imkoniyatlarini yaratishda muhim rol o‘ynaydi. Bugungi kunda turli soha vakillarining keng ishtiroki ushbu yo‘nalishda samarali hamkorlikni rivojlantirish uchun mustahkam asos yaratadi.”

Muhokamalar davomida aholi o‘rtasidagi ovqatlanish odatlari bo‘yicha ma’lumotlarni to‘plash masalasiga alohida e’tibor qaratildi, ayniqsa aholining turli zaif guruhlari kesimida. Bu esa ishlab chiqilayotgan tavsiyalarning madaniy jihatdan mos, milliy sharoitlarga uyg‘un, amaliy jihatdan qo‘llaniladigan hamda ishonchli ilmiy asosga ega bo‘lishini ta’minlaydi.

Ishtirokchilar FSBDGlarni ishlab chiqish va joriy etish jarayonini qo‘llab-quvvatlash uchun tarmoqlararo hamkorlikni kuchaytirish hamda mustahkam ilmiy asos yaratish zarurligini ta’kidladilar.

“Oziq-ovqat tizimlariga asoslangan sog‘lom ovqatlanish bo‘yicha tavsiyalarni ishlab chiqish O‘zbekiston uchun strategik ustuvor yo‘nalish hisoblanadi, chunki bu ovqatlanish bo‘yicha siyosatni qishloq xo‘jaligi va oziq-ovqat tizimlaridagi barqaror o‘zgarishlar bilan uyg‘unlashtirish imkonini beradi. Ushbu jarayon asosli qarorlar qabul qilishni qo‘llab-quvvatlaydi hamda aholi salomatligi va farovonligini oshirishga xizmat qiladi,” — dedi FAOning O‘zbekistondagi vakili o‘rinbosari Sherzod Umarov.

FAO O‘zbekiston va Markaziy Osiyoning boshqa davlatlari bilan birgalikda sog‘lom ovqatlanishni rag‘batlantiruvchi hamda qishloq xo‘jaligi va oziq-ovqat tizimlarining barqarorligi va chidamliligini ta’minlovchi milliy tavsiyalarni ishlab chiqishda qo‘llab-quvvatlashni davom ettiradi.