O‘zbekistonda Nipah virusi qayd etilmagan, epidemiologik vaziyat barqaror

Toshkent, O‘zbekiston (UzDaily.uz) — O‘zbekistonda Nipah virusi bilan kasallanish holatlari qayd etilmagan, deb xabar qildi respublika Sanitariya-epidemiologiya qo‘mitasi.

Mamlakatdagi epidemiologik vaziyat barqaror bo‘lib qolmoqda, bu esa 54 ta chegara nazorat punktlarida olib borilayotgan doimiy nazorat bilan taʼminlanmoqda.

Idora Hindistonga safar rejalashtirayotgan fuqarolarga shaxsiy gigiyena qoidalariga qatʼiy rioya qilish va oziq-ovqat mahsulotlari sifatiga eʼtiborli bo‘lishni eslatdi. Xususan, qo‘llarni sovun bilan yaxshilab yuvish va antiseptik vositalardan foydalanish, meva-sabzavotlarni isteʼmol qilishdan oldin yaxshilab yuvish, ishlov berilmagan suvni ichmaslik, shuningdek, ko‘rshapalaklar tirnashi yoki tishlashi natijasida teshilgan meva-chevadan voz kechish tavsiya etiladi.

Yuqori harorat, kuchli bosh og‘rig‘i yoki boshqa alomatlar paydo bo‘lgan taqdirda, zudlik bilan shifokorga murojaat qilish lozim.

Xalqaro statistika maʼlumotlariga ko‘ra, Nipah virusi sog‘liq uchun jiddiy xavf tug‘diradi. U zoonoz kasallik bo‘lib, hayvonlardan insonga, jumladan, ko‘rshapalaklar orqali, shuningdek, zararlangan mahsulotlar va insondan insonga yuqishi mumkin. So‘nggi yillarda ushbu kasallik holatlari Hindiston va Janubi-Sharqiy Osiyoning boshqa mamlakatlarida muntazam ravishda qayd etilmoqda.

Sanitariya-epidemiologiya qo‘mitasi chegaralardagi doimiy monitoring va gigiyenik tavsiyalarga amal qilish virusning mamlakatga kirib kelishini oldini olish va aholi salomatligini muhofaza qilishda asosiy choralar ekanini taʼkidlaydi.