O‘zbekistonda kontrafakt BAD ishlab chiqaruvchisi 82,4 mln so‘m jarimaga tortildi

Toshkent, O‘zbekiston (UzDaily.uz) — O‘zbekiston Adliya vazirligi huzuridagi Intellektual mulk departamenti kontrafakt biologik faol qo‘shimchalar ishlab chiqarish holatini to‘xtatdi, deya xabar berdi vazirlik matbuot xizmati.

Euro Lifecare kompaniyasi o‘zining “Polifer” nomli BADiga o‘xshash mahalliy mahsulot — “Folifer” ishlab chiqarilishi yuzasidan shikoyat qildi. Kompaniya maʼlumotlariga ko‘ra, mazkur mahsulot ruxsatsiz tarqatilgan va fonetik jihatdan originalga o‘xshashligi orqali isteʼmolchilarni adashtirishi mumkin edi.

22 sentyabrda o‘tkazilgan tekshiruv natijasida qonunbuzarlik tasdiqlandi. Adliya vazirligi kompaniyaning harakatlarini isteʼmolchilarni adashtirish sifatida baholab, «Tovar belgilari, xizmat ko‘rsatish belgilar va tovar kelib chiqishi nomlari to‘g‘risida»gi qonunning 37.1-moddasiga asosan 200 BRV (82,4 mln so‘m) miqdorida jarima soldi.

Bundan avval, sentyabr oyi boshida, Raqobat qo‘mitasi “ORSA” preparatiga o‘xshashligi sababli «Triortasol Orosol+Rux» BADini savdodan chiqarishni topshirgan, shuningdek, Nika Pharm kompaniyasini Forsil qo‘shimchasi reklamada asossiz iddaolar keltirgani uchun jarimaga tortgan edi.