O‘zbekistonda «Kelajak merosi» xalqaro mukofoti taʼsis etildi

Toshkent, O‘zbekiston (UzDaily.uz) — O‘zbekistonda «Kelajak merosi» nomli xalqaro mukofot taʼsis etildi. Mukofot mamlakat ichida va uning tashqarisida adabiyot, madaniyat, sanʼat, fan, taʼlim hamda raqamli texnologiyalar sohalarida faoliyat yuritayotgan va katta yutuqlarga erishgan isteʼdodli shaxslarni qo‘llab-quvvatlash hamda rag‘batlantirishni maqsad qiladi.

Prezident qaroriga ko‘ra, ushbu tashabbus ijodiy va ilmiy soha vakillarining milliy hamda umuminsoniy qadriyatlarni rivojlantirishga qo‘shgan hissasini rag‘batlantirish, shuningdek, madaniy va taʼlimiy taraqqiyotni qo‘llab-quvvatlashga qaratilgan.

2025 yildan boshlab mukofot uchun tanlov har yili yetti yo‘nalish bo‘yicha o‘tkaziladi: adabiyot; madaniy meros; teatr va kino; musiqa va raqs; tasviriy va amaliy sanʼat; moda va dizayn; fan, taʼlim hamda raqamli texnologiyalar.

Har bir nominatsiya bo‘yicha g‘oliblar statuetka, diplom va 10 000 AQSH dollari miqdoridagi pul mukofoti bilan taqdirlanadilar.