Toshkent, O‘zbekiston (UzDaily.uz) — O‘zbekistonda elektromobillar uchun mo‘ljallangan zaryadlash joylarini ichki yonish dvigatelli (IYOD) avtomobillar egallagan holatda jarima solish taklif etildi.

Bu taklif bilan 7 iyul kuni “Tokbor” elektrozapravka tarmog‘i vakili Aziz Parpiyev Savdo-sanoat palatasi tomonidan tashkil etilgan IT-kompaniyalar, kontent-provayderlar va davlat xaridlari vakillari ishtirokidagi ochiq muloqotda chiqdi.

Parpiyevning so‘zlariga ko‘ra, “Tokbor”‘ga elektromobil haydovchilaridan ko‘plab shikoyatlar tushmoqda — zaryadka stansiyalari oldidagi maxsus joylar IYODga ega avtomobillar tomonidan egallab olinmoqda va bu elektrozapravkadan foydalanishga to‘sqinlik qilmoqda.

U taʼkidladiki, o‘tgan yili Prezident Administratsiyasi huzurida mamlakatda elektrozapravkalar tarmog‘ini rivojlantirish bo‘yicha ishchi guruh tashkil etilgan. Bu doirada “Tokbor” Administrativ javobgarlik to‘g‘risidagi kodeksga o‘zgartish kiritishni — elektromobillar uchun mo‘ljallangan joylarda IYOD avtomobillarni qo‘yganlik uchun jazo choralari joriy etishni — taklif qilgan.

2024 yil 1 noyabrdagi Vazirlar Mahkamasi qarorining ijrosi doirasida Ichki ishlar vazirligiga hududiy hokimiyatlar bilan birgalikda zaryadka stansiyalaridan noto‘g‘ri foydalanish holatlarini oldini olish va band qilingan joylarni bo‘shatishga qaratilgan qonunchilik takliflarini ikki oy muddatda tayyorlash vazifasi yuklatilgan edi. Biroq, “Tokbor” vakillari taʼkidlashicha, bu topshiriq haligacha bajarilmagan.

Savdo-sanoat palatasi raisi Davron Vaxabov “Tokbor” taklifini dolzarb va o‘z vaqtida berilgan deb baholab, uchrashuv bayonnomasiga kiritdi.