Toshkent, O‘zbekiston (UzDaily.uz) — 2025 yil 6 iyundan boshlab O‘zbekistonda fuqarolarni kredit firibgarligidan himoya qilishga qaratilgan yangi xizmat joriy etildi.

Kredit byurosi — "Kredit-axborot tahliliy markazi" (KIATS) maʼlumotiga ko‘ra, endi jismoniy shaxslar o‘z xohishiga ko‘ra maxsus reyestrga maʼlumot kiritishlari yoki chiqarishlari mumkin. Ushbu reyestr orqali ularning roziligisiz ular nomidan kredit rasmiylashtirilishi taqiqlanadi.

Bu yangilik fuqarolarga o‘z roziligisiz nomlariga kredit olinishi bilan bog‘liq firibgarlik holatlarining oldini olish imkonini beradi.

Xizmatdan foydalanish uchun kredit byurosiga bepul ariza topshirish kifoya — shundan so‘ng fuqaro avtomatik ravishda maxsus reyestrga kiritiladi.

Yaqin kunlarda ushbu xizmat Davlat xizmatlari markazlari hamda Yagona interaktiv davlat xizmatlari portali (YAIDXP) orqali ham faol bo‘ladi.

Bundan buyon barcha banklar, mikromoliya tashkilotlari va boshqa kredit muassasalari har qanday kredit shartnomasi rasmiylashtirilishidan oldin qarz oluvchi ushbu ro‘yxatda bor-yo‘qligini tekshirishi shart. Bu xizmat aholining shaxsiy maʼlumotlari va moliyaviy xavfsizligini himoya qilish bo‘yicha qo‘shimcha chora sifatida xizmat qiladi.