O‘zbekistonda elektr energiyasi isteʼmolining yangi rekordi qayd etildi

Toshkent, O‘zbekiston (UzDaily.uz) — 2026 yil 11 mart kuni O‘zbekiston energetika tizimida elektr energiyasining sutkalik isteʼmoli va mart oyi uchun maksimal yuklama bo‘yicha yangi rekord qayd etildi. Shu kuni respublika bo‘yicha umumiy isteʼmol 267 mln kVt·soatni tashkil etdi. Bu ko‘rsatkich o‘tgan yilning shu davriga nisbatan 14 mln kVt·soatga ko‘p. Bu haqda Energetika vazirligi maʼlum qildi.

Kechki eng yuqori isteʼmol soatlarida energetika tizimidagi yuklama 18:12 da 12 680 MVtga yetdi. Bu esa 2025 yil mart oyidagi darajadan 480 MVtga yuqori. Shu kun davomida mamlakat elektr stansiyalarida 272 mln kVt·soat elektr energiyasi ishlab chiqarildi. Bu ko‘rsatkich o‘tgan yilga nisbatan 12 mln kVt·soatga ko‘p.

Qayta tiklanuvchi energiya manbalari ulushi ham ortib bormoqda. Bir kun davomida umumiy ishlab chiqarishning 20,9 foizi quyosh va shamol elektr stansiyalari hissasiga to‘g‘ri keldi. Kunduzgi soatlarda esa ularning elektr energiyasi balansidagi ulushi 35 foizgacha yetdi. Aynan quyosh va shamol generatsiyasining ulushi umumiy hajmning 14,3 foizini tashkil qildi.

Isteʼmol rekordi mamlakatda energiyaga bo‘lgan talab o‘sib borayotganini, shuningdek qayta tiklanuvchi energetikaning energiya balansiga faol jalb etilayotganini ko‘rsatadi. Bu esa energetika tizimining barqarorligini mustahkamlash va anʼanaviy energiya manbalariga tushadigan yuklamani kamaytirishga xizmat qiladi.