O‘zbekistonda bloger biologik faol qo‘shimchalarni reklama qilgani uchun javobgarlikka tortildi

Toshkent, O‘zbekiston (UzDaily.uz) — O‘zbekistonda bloger Qahramon Sirajov reklama qonunchiligini buzgani uchun javobgarlikka tortildi.

O‘zbekiston Respublikasi Raqobat qo‘mitasi bloger Qahramon Sirajovga nisbatan reklama to‘g‘risidagi qonunchilikni buzganlik alomatlari bo‘yicha ish qo‘zg‘atdi. U Qahramon Tabib nomi bilan tanilgan.

Agentlikning eʼtiborini blogerning Instagram sahifasida joylangan videolar tortdi. Ularda go‘yoki bo‘g‘imlar egiluvchanligi uchun mo‘ljallangan “Argon” preparatiga nisbatan samaraliroq va arzonroq biologik faol qo‘shimcha yaratilgani haqida maʼlum qilingan.

Reklamada ushbu qo‘shimchaning xususiyatlari bo‘rttirib ko‘rsatilgan, biroq uning xususiyatlari haqida to‘liq maʼlumot berilmagan. Qo‘mita taʼkidlashicha, bunday taqdimot isteʼmolchilarda mahsulotni dori vositasi sifatida qabul qilish tasavvurini uyg‘otishi mumkin.

«Reklama to‘g‘risida»gi qonunning 35-moddasiga ko‘ra, biologik faol qo‘shimchalarni dori vositalariga tenglashtirish, tasdiqlanmagan davolovchi xususiyatlar haqida maʼlumot berish yoki ulardan foydalanish natijasida inson holati yaxshilanganini namoyish etish taqiqlanadi. Shuningdek, biologik faol qo‘shimchalarining reklamasida mahsulot dori vositasi emasligi haqida ogohlantirish bo‘lishi shart.

Tekshiruv yakunlariga ko‘ra, Qo‘mita maxsus komissiyasi tomonidan Sirajovga nisbatan maʼmuriy bayonnoma rasmiylashtirildi.

Ish belgilangan tartibda ko‘rib chiqish uchun sudga yuborildi.