O‘zbekistonda BFQlarni bojsiz olib kirish meʼyorlari oshirildi

Toshkent, O‘zbekiston (UzDaily.uz) — O‘zbekistonda shaxsiy foydalanish uchun biologik faol qo‘shimchalarni (BFQ) bojsiz olib kirish meʼyorlari qayta ko‘rib chiqildi. Bu haqda Bojxona qo‘mitasi matbuot xizmati 9 aprel kuni qabul qilingan Vazirlar Mahkamasi qaroriga tayanib xabar berdi.

Yangilangan qoidalarga ko‘ra, jismoniy shaxslar endilikda xorijdan BADlarning 10 tagacha turini birinchi (zavod) o‘ramda olib kirishi mumkin. Bunda har bir turdan faqat bitta o‘ramga ruxsat etiladi va umumiy og‘irlik 3 kilogrammdan oshmasligi kerak.

Avval bojsiz olib kirish meʼyorlari mahsulot shakliga qarab farq qilar edi. Jumladan, suyuq BFQlar va siroplar uchun 10 ta flakongacha, kukun shaklidagi mahsulotlar uchun 0,5 kilogrammgacha, tabletka va kapsulalar uchun 100 donadan, quritilgan o‘simlik shakllari (gul, poya va ildizlar) uchun esa 0,5 kilogrammgacha cheklov belgilangan edi.

Bojxona qo‘mitasida qayd etilishicha, avval tabletka yoki kapsula shaklidagi mahsulotlarni 100 donagacha olib kirishga ruxsat berilgan bo‘lsa-da, amalda bir o‘ramda 100 dan ortiq mahsulot bo‘lishi holatlari uchrab, bu nazorat jarayonida murakkabliklar keltirib chiqargan.

Idorada taʼkidlanishicha, meʼyorlarni tuzatishda fuqarolarning takliflari va real ehtiyojlari, shuningdek, nazorat funksiyalarini saqlagan holda bojxona maʼmuriyatini soddalashtirish zarurati inobatga olingan.