O‘zbekistonda ayrim kasalliklar mavjud bo‘lgan hollarda xavfsizlik kamaridan foydalanmaslikka ruxsat etildi

Toshkent, O‘zbekiston (UzDaily.uz) — Sog‘liqni saqlash vazirligi avtomobilda xavfsizlik kamaridan foydalanish mumkin bo‘lmagan kasalliklar va holatlar ro‘yxatini tasdiqladi.

Mazkur qoida Hukumatning «Yo‘l harakati qoidalarini tasdiqlash to‘g‘risida»gi qarorida mustahkamlangan bo‘lib, ushbu kasalliklar mavjudligini tasdiqlovchi tibbiy maʼlumotnomaga ega bo‘lgan fuqarolar xavfsizlik kamaridan foydalanmaslik huquqiga ega.

Ro‘yxatga o‘mrov suyagi, ko‘krak suyagi, yelka kamari va qovurg‘alar sinishlari, chap o‘mrov suyagi sinishi, chap o‘mrov suyagining soxta bo‘g‘imi va umurtqa pog‘onasining kompression sinishi bo‘yicha o‘tkazilgan operatsiyalar kiritilgan.

Shuningdek, og‘ir o‘pka kasalliklari bo‘lgan bemorlar — o‘pkaning surunkali obstruktiv kasalligi IV bosqichi, bronxial astmaning IV bosqichi, o‘pkaning interstitsial shikastlanishlari, shuningdek o‘pkaning bir qismi yoki butunlay olib tashlangan holatlarida (lobektomiya, pnevmonektomiya) ham ozod etish nazarda tutilgan.

Ro‘yxatga, shuningdek, surunkali yurak yetishmovchiligining III bosqichi, og‘ir yurak-qon tomir kasalliklari, III darajali semirish (BMI ≥ 40), bo‘yi past bo‘lish (150 smdan past), qo‘l yoki yelka harakatini cheklovchi nevrologik kasalliklar, ko‘krak sohasidagi og‘ir allergik va dermatologik kasalliklar, o‘mrov suyagi, ko‘krak suyagi, yelka, yelka suyagi va qovurg‘alar sohasida ichki yoki tashqi implantlarning mavjudligi, ko‘krak qafasi yoki qorin bo‘shlig‘ida o‘tkazilgan ochiq operatsiyalar, stomaning mavjudligi hamda ko‘krak qafasida yirik o‘smalar kiritilgan.

Tibbiy maʼlumotnoma bir yil muddatga beriladi, biroq o‘pkaning bir qismi yoki butunlay olib tashlangan fuqarolar hamda bo‘yi past bo‘lgan shaxslar uchun maʼlumotnoma muddatsiz rasmiylashtiriladi. Sinishlar yoki operatsiyalar holatida maʼlumotnoma muddati individual tartibda, ikki oydan bir yilgacha belgilanadi.

QR-kodga ega elektron tibbiy maʼlumotnoma «Elektron sog‘liqni saqlash» axborot tizimi orqali rasmiylashtiriladi va bemor biriktirilgan birlamchi tibbiy-sanitariya yordami tibbiyot tashkiloti yoki davolanish o‘tkazilgan muassasa tomonidan beriladi.

Bundan tashqari, maʼlumotnoma bemor davolangan nodavlat tibbiyot klinikasining xulosasi asosida ham birlamchi tibbiy-sanitariya yordami tashkiloti tomonidan berilishi mumkin.