O‘zbekistonda 2,3 mingta tashkilot eng yuqori AAA reytingiga ega bo‘ldi

Toshkent, O‘zbekiston (UzDaily.uz) — O‘zbekistonda o‘tgan yili joriy etilgan tadbirkorlar barqarorligi reytingi tizimi izchil rivojlanishda davom etmoqda.

Davlat soliq qo‘mitasi maʼlumotlariga ko‘ra, hozirgi kunda ushbu tizimda 552,8 mingdan ziyod biznes subyektlari ro‘yxatdan o‘tgan.

Baholash natijalariga muvofiq, 2,3 mingta tashkilot eng yuqori — AAA reytingiga ega bo‘ldi. Bu esa ular uchun qator imtiyozlarni ochadi. Xususan, bunday reytingga ega kompaniyalar soliq tekshiruvlaridan ozod qilinadi va qo‘shimcha jarayonlarsiz bir kun ichida qo‘shilgan qiymat solig‘i (QQS) qaytarib berilishi mumkin. Joriy yil boshidan buyon AAA reytingiga ega tadbirkorlarga avtomatik tarzda 1,8 trln so‘mdan ortiq QQS qaytarib berildi.

Shu bilan birga, deyarli 192 mingta biznes subyektlari eng past — D toifasiga kiritilgan.

Elektron tizim tadbirkorlik subyektlarining soliq intizomi va moliyaviy barqarorligini 23 ta mezon bo‘yicha baholaydi.

Tadbirkorlar o‘z reytingini my3.soliq.uz saytidagi shaxsiy kabineti yoki Soliq mobil ilovasi orqali bilishlari mumkin. Ushbu servis shuningdek sheriklar ishonchliligini tekshirish va shubhali bitimlar tavakkalchiligini minimallashtirish imkonini ham beradi.