O‘zbekistonda 2025 yilda onlayn-savdo hajmi 22,7 trln so‘mga yetdi

Toshkent, O‘zbekiston (UzDaily.uz) — 2025 yil davomida O‘zbekistonda elektron savdo platformalari soni 36 tadan 115 tagacha oshdi, bu 2024 yil ko‘rsatkichiga nisbatan 3,2 barobarga ko‘p, deb xabar berdi Istiqbolli loyihalar milliy agentligi.

Shu bilan birga, elektron tijorat orqali tovarlar sotuvi hajmi 1,5 barobarga o‘sib, 22,7 trln so‘mni tashkil etdi. Elektron savdoning umumiy chakana savdodagi ulushi esa 4,6 foizga yetdi, bu o‘tgan yildagi 3,7 foizga nisbatan yuqoridir.

Agentlik maʼlumotlariga ko‘ra, 2025 yilda mamlakatda chakana savdoning umumiy hajmi 492,8 trln so‘mni tashkil etgan, 2024 yilda esa ushbu ko‘rsatkich 410,07 trln so‘mga teng bo‘lgan.

Taqqoslash uchun, 2020 yilda elektron platformalar orqali amalga oshirilgan savdo hajmi 1 trln so‘mdan sal oshgan bo‘lib, o‘sha yili 199,52 trln so‘mni tashkil etgan umumiy chakana savdo hajmida e-commerce ulushi atigi 0,5 foizni tashkil etgan.