O‘zbekiston Yevropada turizm brendini targ‘ib qilishni kuchaytirmoqda

Toshkent, O‘zbekiston (UzDaily.uz) — O‘zbekiston Yevropa turizm bozorida o‘z mavqeyini mustahkamlamoqda. Turizm qo‘mitasi Germaniyaning nufuzli FVW Medien GmbH media kompaniyasi bilan hamkorlikda yangi loyihani yo‘lga qo‘ydi.

Ushbu tashabbus Germaniya va boshqa Yevropa mamlakatlaridan kelgan sayyohlarning keng auditoriyasiga O‘zbekistonning go‘zalligi, madaniyati va mehmondo‘stligi haqida batafsil ma’lumot yetkazishni maqsad qilgan.

Kampaniya doirasida mashhur "Meine Reise" jurnalida O‘zbekistonning sayyohlik yo‘nalishlari, milliy taomlar va tarixiy merosi haqida maqolalar e’lon qilinishi, shuningdek, ijtimoiy tarmoqlar va online-mediada mamlakatni faol targ‘ib etish rejalashtirilgan.

Bu orqali millionlab yevropaliklar o‘zlari uchun yangi manzillarni kashf etish va O‘zbekiston bo‘ylab sayohat qilishdan ilhom olish imkoniyatiga ega bo‘ladilar.

FVW Medien GmbH kompaniyasi Germaniyaning turizm mediasi sohasidagi eng yirik ishtirokchilaridan biri hisoblanadi. Ushbu hamkorlik O‘zbekiston uchun chet ellik sayyohlarni jalb etish va Markaziy Osiyoning eng yorqin yo‘nalishlaridan biri sifatida mamlakatning xalqaro nufuzini mustahkamlash bo‘yicha yangi imkoniyatlar yaratadi.