Toshkent, O‘zbekiston (UzDaily.uz) — O‘zbekiston Markaziy Osiyo davlatlarining energetik tizimlarini Xitoyning energetik tarmog‘i bilan integratsiya qilish tashabbusini ilgari surmoqda. Bu haqda energetika vaziri o‘rinbosari Umid Mamadaminov «O‘zbekiston 24» telekanaliga bergan intervyusida maʼlum qildi. Mazkur bayonot 17 iyun kuni Ostonada bo‘lib o‘tgan «Markaziy Osiyo – Xitoy» ikkinchi sammiti natijalariga bag‘ishlangan izohda aytilgan.

Mamadaminovning so‘zlariga ko‘ra, prezident Shavkat Mirziyoyev sammitda milliy energetik tizimlarni uyg‘unlashtirish, jumladan, Xitoy va Markaziy Osiyo davlatlari o‘rtasida yuqori kuchlanishli elektr uzatish liniyasi qurilishi loyihasini amalga oshirish muhimligini alohida taʼkidlagan.

«Infratuzilmaviy rivojlanish va energetika sammitning asosiy mavzulari bo‘ldi. Prezidentimiz Xitoy va Markaziy Osiyoni bog‘laydigan energetik koridor yaratish tashabbusini ilgari surdi. Bu taklif nafaqat mintaqamiz, balki Xitoy uchun ham strategik ahamiyatga ega», — dedi vazir o‘rinbosari.

Uning qayd etishicha, O‘zbekiston hozirda KXR tomonga Qozog‘iston va Qirg‘iziston orqali o‘tuvchi transchegaraviy elektr uzatish liniyalari loyihasi yuzasidan hisob-kitob ishlarini boshlab yuborgan. Ushbu loyihaga o‘xshash tashabbus Yevropa yo‘nalishida ham — Ozarbayjon orqali «yashil energetik koridor» ko‘rinishida ilgari surilgan edi.

Mamadaminovga ko‘ra, prezident Mirziyoyev energetik infratuzilmani uyg‘unlashtirish va hududiy tizimlarni yagona tarmoqqa bog‘lash zarurligini taʼkidlagan. Bu, xususan, Xitoyda elektr energiyasiga bo‘lgan talab ortib borayotganini hisobga olgan holda, iqtisodiy samarador va o‘zaro manfaatli mexanizmga aylanadi.

«Masalan, qishda gaz yetishmasligi sharoitida Xitoydagi ortiqcha energiyani import qilish mumkin bo‘ladi», — deya izohladi Energetika vazirligi vakili.

Sammit doirasida Power Central Asia + China energetik forumi ham bo‘lib o‘tdi. Unda yuqori kuchlanishli doimiy tok (HVDC) liniyalarini qurish va intellektual boshqaruv tizimlari (smart grid)ni joriy etish kabi ilg‘or texnologiyalar muhokama qilindi.

«Xitoyning energetik tarmoqlarni modernizatsiya qilish va qayta tiklanuvchi energiya manbalarini (QTEM) integratsiyalash borasidagi tajribasiga alohida eʼtibor qaratildi. Mintaqada barqaror, moslashuvchan va xavfsiz energetik tizim yaratish yuzasidan hamkorlik qilish bo‘yicha kelishuvga erishildi», — deya taʼkidladi Mamadaminov.