O‘zbekiston XAEA bilan yadro texnologiyalarini rivojlantirish va birinchi AES qurilishini muhokama qildi

Toshkent, O‘zbekiston (UzDaily.uz) — XAEAning 69-Bosh konferensiyasi doirasida XAEA bosh direktori o‘rinbosari Lyu Xuaning "O‘zatom" agentligi, Energetika vazirligi hamda Sanoat, radiatsiya va yadro xavfsizligi qo‘mitasi rahbarlaridan iborat O‘zbekiston delegatsiyasi bilan uchrashuvi bo‘lib o‘tdi.

Tomonlar O‘zbekiston iqtisodiyotining turli sohalarida, jumladan, energetika, tibbiyot va qishloq xo‘jaligida yadro texnologiyalarini qo‘llash bo‘yicha erishilgan natijalar, amalga oshirilayotgan ishlar va rejalarni muhokama qilishdi.

XAEA vakillari O‘zbekiston yadro dasturini rivojlantirishda sezilarli yutuqlarga erishganini, shuningdek, hukumatning tinch maqsadlarda atom energiyasidan foydalanishni kengaytirish uchun asos yaratayotgan faol ishtirokini ta’kidlab o’tishdi.

Mamlakatning barqaror energetika kelajagini ta’minlashda muhim element hisoblangan O‘zbekistonda birinchi atom elektr stansiyasini qurish loyihasining ahamiyati muhokama qilindi. O‘zbekiston ushbu loyihani amalga oshirish maqsadida XAEA bilan texnik hamkorlikni kengaytirishdan manfaatdorlik bildirdi.

Uchrashuv O‘zbekiston va XAEA o‘rtasidagi hamkorlikni yanada rivojlantirish istiqbollari yuzasidan fikr almashish bilan yakunlandi. Tomonlar barqaror rivojlanish manfaatlari yo‘lida yadro texnologiyalarini rivojlantirishga qaratilgan muloqotni davom ettirish va loyihalar ustida birgalikda ishlashga tayyor ekanliklarini tasdiqlashdi.

O‘zbekiston bundan buyon ham XAEA bilan faol hamkorlik qilish, yadro energetikasi masalalari bo‘yicha xalqaro forumlarda ishtirok etish, atom energiyasidan foydalanish xavfsizligi va samaradorligini ta’minlaydigan ilg‘or texnologiyalarni joriy etish niyatida.