Toshkent, O‘zbekiston (UzDaily.uz) — Oʻzbekiston Respublikasi Investitsiyalar, sanoat va savdo vazirligida Yuta shtati (AQSh) delegatsiyasi bilan uchrashuv boʻlib oʻtdi, unda sarmoyaviy, savdo-iqtisodiy va moliyaviy hamkorlikni mustahkamlashga oid keng koʻlamli masalalar muhokama qilindi.

Tomonlar muhim foydali qazilmalarni qazib olish va qayta ishlash, axborot texnologiyalarini rivojlantirish, taʼlim dasturlari, metallurgiya sanoati, qishloq xoʻjaligi, transport-logistika infratuzilmasi kabi qator ustuvor yoʻnalishlarda qoʻshma loyihalarni amalga oshirish istiqbollarini koʻrib chiqdilar.

Alohida e'tibor O'zbekistonning sanoat salohiyati va Yuta shtatining texnologik imkoniyatlari o'rtasida umumiy til topishga, shuningdek, mintaqalararo aloqalarni mustahkamlash va ikki tomon ishbilarmon doiralari o'rtasida to'g'ridan-to'g'ri aloqalarni o'rnatishga ko'maklashishga qaratildi.

Uchrashuv yakunida muhokama qilingan barcha sohalarda barqaror rivojlanish va texnologik sheriklikka urgʻu berilgan holda ikki tomonlama hamkorlikni yanada kengaytirish va chuqurlashtirishdan oʻzaro manfaatdorlik bildirildi.