Toshkent, O‘zbekiston (UzDaily.uz) — Turizm qoʻmitasi raisining birinchi oʻrinbosari Jamshid Abdusalomov boshchiligidagi Oʻzbekiston delegatsiyasi Yoqutistonda Saxa Respublikasi rahbari Aysen Nikolayev bilan muzokaralar oʻtkazdi.

Uchrashuvda O‘zbekiston Respublikasi va Yoqutiston o‘rtasidagi hamkorlikning istiqbolli yo‘nalishlari muhokama qilindi. O‘zbekiston turizm sohasida ulkan tarixiy-madaniy salohiyatga ega ekani ta’kidlandi. “Rossiyada O‘zbekiston turizmi yili” doirasida Rossiyaning chekka hududlarida O‘zbekiston Respublikasining sayyohlik salohiyatini targ‘ib qilish va o‘zaro sayyohlik oqimini oshirishga qaratilgan tadbirlar o‘tkazilmoqda.

Tomonlar talabalar va maktab o‘quvchilari uchun ta’lim turizmini tashkil etishda o‘zaro hamkorlikning istiqbolli yo‘nalishlarini ham muhokama qildilar. Xususan, qo‘shma ta’lim dasturlari va almashinuvlarni yo‘lga qo‘yish taklif etildi. Bu ikki respublika talabalari va maktab o‘quvchilariga bir-birining madaniyati va tarixi haqida ko‘proq bilim olish imkonini beradi, shuningdek, yoshlar o‘rtasidagi o‘zaro tushunish va hamkorlikni mustahkamlaydi.

O‘tgan yili O‘zbekiston Respublikasiga tashrif buyurgan xorijiy sayyohlar soni qariyb 10,2 million kishini tashkil etdi, shundan 850 ming nafari Rossiya Federatsiyasi fuqarolaridir. Joriy yilda O‘zbekistonga Rossiyadan 1 milliondan ortiq mehmon kelishi kutilmoqda.