Toshkent, O‘zbekiston (UzDaily.uz) — Yevropa tiklanish va taraqqiyot banki (YETTB) hamda O‘zbekiston Respublikasi o‘rtasidagi Forum doirasida 250 million AQSH dollarigacha bo‘lgan suveren kredit ajratish to‘g‘risida kelishuv imzolandi. Mazkur mablag‘lar mamlakat bo‘ylab joylashgan 110 ta sug‘orish nasos stansiyalarini modernizatsiya qilishga yo‘naltiriladi.

Loyiha O‘zbekistonning o‘nta hududini qamrab oladi va milliy sug‘orish tizimini modernizatsiya qilish dasturining muhim qismi hisoblanadi.

Loyihaning amalga oshirilishi natijasida har yili 251 ming megavatt-soat elektr energiyasi tejalishi va atmosferaga chiqariladigan uglerod gazi miqdori 117 ming tonnadan ziyodga kamayishi kutilmoqda. Shuningdek, nasos stansiyalarining tomlariga quyosh panellari o‘rnatish orqali energiya samaradorligi va obyektlarning barqarorligi oshiriladi.

Ayni vaqtda YETTBning O‘zbekistondagi investitsiyaviy portfeli 5,6 milliard yevro qiymatiga ega 181 loyihani o‘z ichiga oladi. Mablag‘larning asosiy qismi xususiy sektorni qo‘llab-quvvatlash va rivojlantirishga yo‘naltirilgan. O‘zbekiston ketma-ket besh yildan buyon YETTBning Markaziy Osiyodagi eng yirik investitsiya oluvchisi maqomini saqlab kelmoqda.