Toshkent, O‘zbekiston (UzDaily.uz) — Joriy yil 27 avgust kuni O‘zbekiston Savdo-sanoat palatasida Xitoy Xalq Respublikasining Xitoy Xalq Respublikasi Shinjon-Uyg‘ur avtonom rayoni Ili-Qozoq avtonom viloyati delegatsiyasi bilan uchrashuv bo‘lib o‘tdi. Unda Palata raisi o‘rinbosari Dilshod Rasulov va Xitoy delegatsiyasi rahbari Chjan Szinpin ishtirok etdi.

Suhbat chog‘ida ikki tomonlama hamkorlikni yangi bosqichga olib chiqish masalalari muhokama qilindi. Xususan, qishloq xo‘jaligi va agrar mahsulotlarni qayta ishlash, ichimliklar ishlab chiqarish, hisoblash texnikasi va yuqori texnologiyalar, tog‘-metallurgiya sanoati, xalqaro ko‘rgazmalar va biznes forumlar tashkil etish kabi sohalarda qo‘shma loyihalarni yo‘lga qo‘yishga alohida eʼtibor qaratildi.

Shuningdek, iqtisodiyot, savdo, investitsiya va madaniy-gumanitar aloqalarni mustahkamlash masalalari ham muhokama etildi. Uchrashuvda tomonlar hamkorlikning strategik ahamiyatini taʼkidlab, ikki mamlakat tadbirkorlari uchun yangidan-yangi imkoniyatlar yaratishga tayyor ekanliklarini bildirdilar.

Muzokaralar yakunida hamkorlikka oid memorandum imzolandi. Ushbu hujjat savdo-iqtisodiy munosabatlarni chuqurlashtirish, sanoat va qishloq xo‘jaligi sohalarida qo‘shma korxonalar tashkil etish, innovatsion texnologiyalar almashinuvini yo‘lga qo‘yish va tadbirkorlar uchun qulay muhit yaratishni nazarda tutadi.

Shu bilan birga, ushbu kelishuv O‘zbekiston iqtisodiyotining diversifikatsiyasi, eksport salohiyatining oshishi va xorijiy investitsiyalarni jalb etishda ham katta ahamiyat kasb etadi.