Toshkent, O‘zbekiston (UzDaily.uz) — 29 avgust kuni O‘zbekiston Savdo-sanoat palatasi raisi o‘rinbosari Dilshod Rasulov Xitoy Xalq Respublikasining Shensi provinsiyasi Taʼminot va savdo hamkorlik uyushmasi raisi Su Linyuan bilan muzokaralar o‘tkazdi.

Uchrashuvda xitoylik hamkorlar O‘zbekiston-Xitoy munosabatlari yillar davomida ishonchli va barqaror asosda rivojlanib kelayotganini taʼkidlab o‘tishdi. Shuningdek, Shensi provinsiyasining strategik geografik ahamiyatga ega ekani, Buyuk Ipak yo‘li aynan shu hududdan boshlangani va buning qishloq xo‘jaligi sohasidagi yutuqlar uchun muhim omil sifatida xizmat qilayotgani qayd etildi.

O‘z navbatida, D.Rasulov Xitoy O‘zbekistonning asosiy savdo hamkorlaridan biri ekanligini taʼkidlab, mamlakatimiz qishloq xo‘jaligi sohasidagi imkoniyatlar, barqaror rivojlanish tendensiyalari, to‘g‘ridan-to‘g‘ri investitsiyalar va eksport-import yo‘nalishidagi o‘sish ko‘rsatkichlari haqida maʼlumot berdi.

Muzokara davomida qishloq xo‘jaligi, qayta ishlash sanoati va sifatli oziq-ovqat ishlab chiqarish yo‘nalishlarida yangi qo‘shma loyihalarni amalga oshirish imkoniyatlari muhokama qilindi.

Yakunda ikki tomonlama hamkorlikning amaliy ahamiyatga ega ekani qayd etildi va qishloq xo‘jaligini rivojlantirish, eksport-import salohiyatini oshirish hamda o‘zaro manfaatli aloqalarni mustahkamlash borasida yangi bosqichlarga erishishga kelishib olindi.