Toshkent, O‘zbekiston (UzDaily.uz) — Oʻzbekiston Respublikasi Qishloq xoʻjaligi vaziri Ibrohim Abdurahmonov Xitoy Xalq Respublikasining “WANLIN Group” kompaniyasi direktori Li Yan Tao bilan videokonferensiya shaklida uchrashuv oʻtkazdi.

Muloqot davomida tomonlar agrar sohada oʻzaro manfaatli hamkorlikni rivojlantirish istiqbollarini muhokama qildilar. Xususan, “Xitoy tajribasi asosida Oʻzbekistonda piyoz, sabzi, sarimsoq piyoz kabi sabzavot mahsulotlarini yetishtirish” loyihasini amalga oshirish boʻyicha fikr almashildi.

Suhbat chogʻida Oʻzbekiston bilan Xitoy oʻrtasidagi qishloq xoʻjaligi sohasidagi hamkorlik izchil mustahkamlanib borayotgani alohida taʼkidlandi. Bu esa oʻz navbatida, mamlakatimiz agrar tarmogʻiga yangi agrotexnologiyalarni joriy etish, urugʻchilikni rivojlantirish, ilmiy izlanishlar va innovatsiyalar, shuningdek, tajriba almashuvini kengaytirishga xizmat qilmoqda. 

Uchrashuv yakunida “Xitoy tajribasi asosida Oʻzbekistonda piyoz, sabzi, sarimsoq piyoz kabi sabzavot mahsulotlarini yetishtirish” loyihasini amalga oshirish boʻyicha Anglashuv Memorandumi imzolandi.

Mazkur hujjat, ayniqsa, sabzavot mahsulotlarini yetishtirish va ularni qayta ishlash jarayonlarida zamonaviy agrotexnologiyalarni joriy etish orqali mamlakatimiz qishloq xoʻjaligi sohasining rivojlanishida muhim oʻrin tutadi.