O‘zbekiston va Xitoy gidroakkumulyatsiyalovchi stansiyalar hamda yangi elektr uzatish liniyalarini qurish bo‘yicha kelishib oldi

Toshkent, O‘zbekiston (UzDaily.uz) — O‘zbekiston energetika vaziri Jurabek Mirzamaxmudov «O‘zbekiston 24» telekanaliga bergan intervyusida Shanxay hamkorlik tashkiloti (SHHT) davlatlari o‘rtasida energetika sohasidagi hamkorlik, investitsiya loyihalarini amalga oshirish va mintaqaviy energetik tizimlarning o‘zaro bog‘liqligini oshirish masalalari muhokamalari natijalari haqida so‘zlab berdi.

Uning so‘zlariga ko‘ra, Xitoy energetika sohasida O‘zbekistonning eng yirik investitsiya va texnologiyaviy hamkori bo‘lib qolmoqda. «Xitoydan nafaqat investitsiyalar kelmoqda, balki asosiy texnologik jihozlarning deyarli barchasi shu yerdan yetkazib beriladi, chunki bu davlat ushbu sohada eng zamonaviy texnologiyalarga ega», — deya taʼkidladi vazir.

Tomonlar O‘zbekistonda gidroakkumulyatsiyalovchi elektr stansiyalarini (GAES) qurish, shuningdek yangi elektr uzatish liniyalarini barpo etish va ishga tushirish bo‘yicha uzoq muddatli loyihalarni amalga oshirish haqida kelishuvga erishdilar.

Poytaxtda elektr taʼminotini barqarorlashtirish maqsadida Xitoydan ko‘chma mobil podstansiyalar yetkazib beriladi. Ularni statsionar obyektlar taʼmirlanishi davrida qo‘llash rejalashtirilmoqda.

Alohida eʼtibor China Datang Corporation bilan hamkorlikda kadrlar tayyorlashga qaratildi: o‘zbek mutaxassislari qayta tiklanadigan energetika yo‘nalishida o‘qish va malaka oshirish kurslarini o‘tadilar.