Toshkent, O‘zbekiston (UzDaily.uz) — O‘zbekiston–Xitoy iqtisodiy aloqalarida yangi sahifa ochildi. Investitsiyalar, sanoat va savdo vazirining birinchi o‘rinbosari Nozimjon Xolmurodov boshchiligidagi “O‘zcharmsanoat” uyushmasi delegatsiyasi Xitoy Xalqaro Savdoni Rivojlantirish Qo‘mitasi (CCPIT) Guanchjou bo‘limi vakillari bilan uchrashdi.

Muzokaralar davomida tomonlar O‘zbekiston charm-poyabzal sanoatining jadal modernizatsiyasi, ishlab chiqarish imkoniyatlari va eksport salohiyati yuzasidan batafsil fikr almashdi. Xitoy tomoni mamlakatimizdagi sanoat zonalari imkoniyatlari bilan tanishtirildi hamda mavjud infratuzilma xorijiy investorlar uchun jozibador omil sifatida qayd etildi.

Xitoy kompaniyalari O‘zbekistonda charm mahsulotlari ishlab chiqarishga ixtisoslashgan kichik sanoat zonalarida qo‘shma loyihalar amalga oshirishga qiziqish bildirdi. Uchrashuvda ishlab chiqarish quvvatlarini kengaytirish, yangi texnologiyalarni joriy qilish va eksportni oshirishga xizmat qiluvchi tashabbuslar alohida muhokama qilindi.

Delegatsiya a’zolari O‘zbekiston bozoriga oid maxsus taqdimot o‘tkazib, mamlakatimizning ichki va tashqi bozorlardagi o‘rni, logistika imkoniyatlari hamda xalqaro hamkorlik istiqbollari haqida ma’lumot berdi.

Xitoy Xalqaro Savdoni Rivojlantirish Qo‘mitasi bilan o‘tkazilgan muzokaralar ikki tomonlama iqtisodiy hamkorlikni yanada kengaytirish, qo‘shma loyihalarni amalga oshirish va O‘zbekiston charm sanoatini yangi bosqichga olib chiqishga xizmat qilishi kutilmoqda.