Toshkent, O‘zbekiston (UzDaily.uz) — Toshkent shahrida O‘zbekiston va Turkiya o‘rtasidagi savdo-iqtisodiy hamkorlik bo‘yicha Hukumatlararo komissiyaning 7-yig‘ilishida belgilangan topshiriqlarni bajarishga bag‘ishlangan Ishchi guruh yig‘ilishi bo‘lib o‘tdi.

Muhokamalarda ikki davlatning tegishli vazirlik va idoralari vakillari ishtirok etdi.

Turkiya delegatsiyasiga mamlakat Savdo vazirligining departament direktori Hakki Burundju rahbarlik qildi. O‘zbekiston tomonidan iqtisodiyot va moliya vazirligi mutaxassislari, shuningdek, boshqa tegishli idoralar va tarmoq tashkilotlari vakillari ishtirok etdi.

Yig‘ilish davomida «Harakatlar rejasi»da belgilangan vazifalarni amalga oshirish holati batafsil tahlil qilindi. Tomonlar turli sohalardagi mavjud to‘siqlarni bartaraf etish va rejalashtirilgan loyihalarni tezroq amalga oshirish bo‘yicha aniq takliflar bildirishdi.

Shuningdek, tomonlar joriy yilda Toshkentda bo‘lib o‘tadigan Hukumatlararo komissiyaning 8-yig‘ilishi va Biznes-forumga tayyorgarlik ko‘rish bo‘yicha keyingi qadamlarni belgilab olishdi.

Yig‘ilish yakunida tomonlar ikki tomonlama hamkorlikni mustahkamlashga tayyorligini tasdiqladilar va belgilangan maqsadlarga erishish uchun tizimli ishlarni davom ettirishga kelishib oldilar.