O‘zbekiston va Rossiya kreativ iqtisodiyotni rivojlantirish bo‘yicha bayonnoma imzoladi

Toshkent, O‘zbekiston (UzDaily.uz) — Sankt-Peterburg shahrida Kreativ iqtisodiyot bo‘yicha xalqaro konferensiya doirasida O‘zbekiston Madaniyat va san’atni rivojlantirish jamg‘armasi va Rossiya Federatsiyasining Strategik tashabbuslar agentligi o‘rtasida Hamkorlik to‘g‘risidagi bayonnoma imzolandi.

Hujjatni O‘zbekiston Madaniyat va san’atni rivojlantirish jamg‘armasi raisi Gayane Umerova va Strategik tashabbuslar agentligi bosh direktori Svetlana Chupsheva imzoladilar.

Bitim Rossiyaning 67 ta hududida allaqachon qo‘llanilayotgan tartibga solishning eng yaxshi amaliyotlari, metodologik asos va tahliliy vositalarni o‘z ichiga olgan Kreativ sanoatni rivojlantirish mintaqaviy standartini O‘zbekistonga moslashtirish va joriy etishni nazarda tutadi.

Ushbu kelishuv O‘zbekiston va Rossiya o‘rtasida kreativ iqtisodiyot sohasidagi sheriklikni mustahkamlashda muhim qadam bo‘lib, tajriba almashish, qo‘shma tadqiqotlarni o‘tkazish hamda kreativ sanoat tarmoqlarini rivojlantirish strategiyalarini ishlab chiqish uchun yangi imkoniyatlarni ochadi.