O‘zbekiston va Rossiya Federatsiyasi o‘rtasida migratsiyasi sohasidagi masalalar muhokama qilindi

Toshkent, O‘zbekiston (UzDaily.uz) — Migratsiya agentligi rahbari Behzod Musayev hamda Rossiya Federatsiyasining O‘zbekistondagi Favqulodda va Muxtor Elchisi Aleksey Yerxov o‘rtasida uchrashuv bo‘lib o‘tdi.

Suhbat davomida ikki mamlakat o‘rtasida mehnat migratsiyasi sohasidagi hamkorlik masalalari atroflicha ko‘rib chiqildi.

Rossiya Federatsiyasi korxonalarida tashkiliy va qonuniy tartibda ishlash istagida bo‘lgan nomzodlar uchun migratsiyagacha bo‘lgan jarayonlarni O‘zbekiston hududida tashkil qilish bo‘yicha aniq takliflar berildi.

Tomonlar bu sohadagi mavjud muammolarni muhokama qilib, ikki davlat qonunchiligidan kelib chiqqan holda qayta ko‘rib chiqishga kelishib oldilar.