Toshkent, O‘zbekiston (UzDaily.uz) — O‘zbekiston Respublikasi Tashqi ishlar vaziri Baxtiyor Saidov Islom Respublikasi Pokiston Bosh vazirining o‘rinbosari, tashqi ishlar vaziri va senator Muhammad Isʼhoq Dar bilan muzokaralar o‘tkazdi.

Uchrashuv chog‘ida tomonlar jadal rivojlanayotgan O‘zbekiston–Pokiston hamkorligini muhokama qildilar hamda uni yana-da chuqurlashtirishning ustuvor yo‘nalishlarini belgiladilar. Savdo-iqtisodiy aloqalarni kengaytirish, investitsiya hajmini oshirish, transport, logistika, taʼlim va madaniyat sohalarida sheriklikni faollashtirish masalalariga alohida eʼtibor qaratildi.

Vazirlar yuqori darajadagi muzokaralar davomida erishilgan barcha kelishuvlarni samarali amalga oshirishga qatʼiy sodiqliklarini yana bir bor tasdiqladilar. Shu bilan birga, bu kelishuvlarni hayotga tatbiq etishda izchil va muvofiqlashtirilgan ishlarning muhimligi taʼkidlandi.

Uchrashuvning asosiy natijasi O‘zbekiston va Pokiston hukumatlari o‘rtasida Harakatlar rejasi imzolangani bo‘ldi. Hujjat strategik ahamiyatga ega loyihalar va tashabbuslarni tezkor amalga oshirish bo‘yicha aniq qadamlarni nazarda tutadi va siyosiy kelishuvlarni amaliy hamda o‘lchovli natijalarga aylantirishga qaratilgan.