Toshkent, O‘zbekiston (UzDaily.uz) — “O‘zcharmsanoat” uyushmasi vakillari Pokistonga amalga oshirilgan biznes-missiya doirasida Lahor shahrida bir qator samarali uchrashuvlar o‘tkazdi.

Tashrif davomida delegatsiya Pokistonning yetakchi teri va poyabzal ishlab chiqaruvchisi — “Dada Enterprises Limited” rahbariyati bilan muzokaralar o‘tkazdi. 1965 yilda tashkil etilgan kompaniya bugungi kunda 60 dan ortiq mamlakatga teri mahsulotlarini eksport qilmoqda. Kompaniyaning terini qayta ishlash va poyabzal ishlab chiqarish sohasidagi yillik tovar aylanmasi 50 million dollarni tashkil etadi. Korxona LWG Gold Rated, BSCI, ISO 9001 va ISO 14001 xalqaro sertifikatlarga ega.

Uchrashuv chog‘ida O‘zbekiston charm-poyabzal sanoatida amalga oshirilayotgan islohotlar, tadbirkorlar uchun yaratilgan soliq va bojxona imtiyozlari, investitsiya va eksport imkoniyatlari haqida taqdimot o‘tkazildi. Muzokaralar yakunida tomonlar o‘rtasida o‘zaro anglashuv memorandumi imzolandi.

Delegatsiya, shuningdek, Pakistan Tanners Association rahbariyati bilan muzokaralar olib bordi. Ushbu uyushma Pokiston charm sanoatining yetakchi ishtirokchisi hisoblanadi va mamlakat eksport hajmida muhim o‘rin tutadi.

Uchrashuv davomida Lahor shahrining yirik kompaniyalari rahbarlariga O‘zbekistondagi islohotlar, soliq va bojxona imtiyozlari, investitsiya muhiti haqida taqdimot qilindi. Tadbirda Pokiston ishbilarmonlarini O‘zbekistonga “biznes-tur” tashrifini amalga oshirish taklifi bildirildi.

Tashrif doirasida o‘tkazilgan muzokaralar ikki mamlakat o‘rtasidagi hamkorlikni mustahkamlash, investitsiya va savdo aloqalarini rivojlantirishga xizmat qiladi.