Toshkent, O‘zbekiston (UzDaily.uz) — Osiyo infratuzilma investitsiyalari bankining (OIIB) 10-yillik yig‘ilishi doirasida O‘zbekiston Respublikasi va OIIB o‘rtasida Qoraqalpog‘iston Respublikasi hamda Xorazm viloyatlarida mahalliy yo‘llar infratuzilmasini rivojlantirish bo‘yicha 71,1 million AQSh dollari miqdoridagi kredit bo‘yicha muzokaralarni yakunladi.

Mazkur kredit AIIB Prezidenti tomonidan tasdiqlanishi rejalashtirilayotgan jami 173,4 million AQSH dollari hajmidagi ikki bosqichli moliyalashtirish dasturining birinchi qismi bo‘lishi kutilmoqda. Ushbu Loyiha orqali Qoraqalpog‘iston va Xorazm hududlarida iqlimga chidamli va inklyuziv yo‘l-transport tarmog‘i rivojlantiriladi, aholi uchun bozorlar va ijtimoiy xizmatlarga yetib borish imkoniyatlari kengaytiriladi.

Moliyalashtirish bosqichma-bosqich amalga oshiriladi. Birinchi bosqich Xorazm viloyatidagi eng ustuvor qishloq yo‘llarini rekonstruksiya qilishni nazarda tutadi, ikkinchi bosqich Qoraqalpog‘iston Respublikasidagi qishloq yo‘llarini ta’mirlash va modernizatsiyalashtirishga qaratiladi.

Ushbu bosqichli yondashuv O‘zbekiston hukumati uchun budjet mablag‘larini bosqichma-bosqich o‘zlashtirish, milliy infratuzilma rivojlantirish bo‘yicha ustuvorliklarni moslashtirish va loyihani samarali amalga oshirish imkonini yaratadi. Shu bilan birga, OIIB har bir bosqichda loyihani monitoring qilish, institut salohiyatini mustahkamlash hamda ilgari olingan tajribalardan foydalanish orqali qo‘llab-quvvatlashni davom ettiradi.

Loyiha bo‘yicha OIIB Prezidenti tomonidan kredit ajratilishi 2025-yilning uchinchi choragida ko‘rib chiqilishi kutilmoqda.

Osiyo infratuzilma investitsiyalari banki (OIIB) — bu 2016-yilda faoliyat boshlagan va bugungi kunda 110 ta a’zo mamlakatga ega bo‘lgan xalqaro moliya institutidir. Bank 100 milliard AQSh dollari ustav kapitaliga ega bo‘lib, yirik xalqaro reyting agentliklari tomonidan AAA darajasida baholangan. OIIB barqaror rivojlanish, mintaqaviy hamkorlik va infratuzilma sohasidagi investitsiyalarni qo‘llab-quvvatlash orqali iqtisodiy o‘sishni rag‘batlantirishga xizmat qiladi.