Toshkent, O‘zbekiston (UzDaily.uz) — 2025 yil 13 may kuni Turizm qo‘mitasi raisi Umid Shadiyev O‘zbekistondagi Mo‘g‘uliston elchisi Batbaatar Daadanxuu hamda mo‘g‘ul aviakompaniyasi Hunnu Air bosh direktori Monxjargal Purevjal bilan uchrashuv o‘tkazdi.

Muzokaralar chog‘ida O‘zbekistonda turizm sohasini rivojlantirish, xorijiy va mahalliy sayyohlar sonini oshirish, shuningdek, sohaga xususiy tadbirkorlarni keng jalb qilish bo‘yicha amalga oshirilayotgan ishlar haqida batafsil maʼlumot taqdim etildi.

Alohida eʼtibor Davlat rahbari tomonidan berilgan topshiriq va vazifalar ijrosiga, jumladan, Mo‘g‘uliston bilan turizm sohasidagi hamkorlikni kengaytirishga qaratildi.

Mo‘g‘uliston tomoni O‘zbekistonda turizm sohasida olib borilayotgan islohotlarni yuqori baholadi va turizm infratuzilmasini rivojlantirish borasidagi tajribasi bilan o‘rtoqlashdi.

Shuningdek, ikki mamlakat o‘rtasidagi hamkorlikni kengaytirish, jumladan, to‘g‘ridan-to‘g‘ri aviaqatnovlarni tashkil etish, bu esa turistik oqimni oshirish va ikki tomonlama aloqalarni mustahkamlashga xizmat qilishi bo‘yicha masalalar muhokama qilindi.