O‘zbekiston va Latviya qishloq xo‘jaligi va organik dehqonchilik sohasida hamkorlikni kengaytirish masalalarini muhokama qildi

Toshkent, O‘zbekiston (UzDaily.uz) — Qishloq xo‘jaligi vaziri o‘rinbosari Alisher Shukurov Latviyaning O‘zbekistondagi Favqulodda va Muxtor elchisi Girts Jaunzems bilan uchrashdi. Tomonlar qishloq xo‘jaligi sohasidagi hamkorlikni kengaytirish masalalarini muhokama qildilar.

Alisher Shukurov O‘zbekistonda yer-suv resurslarini boshqarish va fermerlarni qo‘llab-quvvatlash bo‘yicha amalga oshirilayotgan islohotlar haqida ma’lumot berdi. U Yevropa davlatlari bilan texnologik hamkorlikning ahamiyatini alohida ta’kidladi.

Elchi Girts Jaunzems Latviya tajribasi — ekologik toza mahsulotlar ishlab chiqarish, organik dehqonchilik va oziq-ovqat xavfsizligi borasida erishilgan yutuqlar haqida so‘z yuritdi. U Latviya O‘zbekiston bilan tajriba almashishga tayyor ekanini bildirdi.

Uchrashuvda ilmiy-tadqiqot ishlari, zamonaviy sug‘orish texnologiyalari, chorvachilik va bog‘dorchilik yo‘nalishlarida qo‘shma loyihalar ishlab chiqish masalalari muhokama qilindi. Shuningdek, Latviya kompaniyalarining meva-sabzavotni qayta ishlash va eksportga tayyorlash sohalarida investitsiya loyihalarini amalga oshirishi uchun qulay sharoitlar yaratilgani ta’kidlandi.

Bundan tashqari, uchrashuv davomida tomonlar kooperativlar va kichik fermer xo‘jaliklarini rivojlantirish masalalariga alohida e’tibor qaratdilar. Bu borada Latviya tajribasi — fermerlarning resurslardan samarali foydalanishi hamda mahsulotni bozorlarga birgalikda yetkazib berish tizimi — O‘zbekiston uchun amaliy ahamiyatga ega ekani ta’kidlandi.

Shuningdek, agrota’lim va kasbiy malaka oshirish sohasida hamkorlikni kengaytirish, ikki mamlakat o‘quv muassasalari o‘rtasida tajriba almashish, hamda qishloq xo‘jaligi mutaxassislarining bilim va ko‘nikmalarini oshirish bo‘yicha istiqbolli rejalar belgilab olindi.